Mirziyoyev bir guruh tadbirkorlarga mukofot topshirdi

north_east

Ortiqxo‘jayevdan Hoshimovgacha. Prezident bir guruh tadbirkorlarni mukofotladi

O‘zbekiston Respublikasi Prezidentining shu yil 18 avgustdagi farmoniga muvofiq, mamlakat iqtisodiy qudrati va eksport salohiyatini oshirayotgan, aholi bandligi va farovonligini ta’minlash yo‘lida jonbozlik ko‘rsatayotgan bir guruh tadbirkorlar faxriy unvonlar, orden va medallar bilan mukofotlangan edi. Bugun, 20 avgust kuni Yangi Toshkentda mazkur mukofotlarni topshirish marosimi bo‘ldi. Bu haqda Prezident matbuot xizmati xabar berdi.

Prezident Shavkat Mirziyoyev yig‘ilganlarni Tadbirkorlar kuni va yaqinlashib kelayotgan Mustaqillik bayrami bilan tabrikladi.

“Bugungi marosimda yetakchi tadbirkorlarni, jamiyatimizning eng ilg‘or vakillarini ko‘rib turganimdan xursandman. Bu sohada katta islohotlarni boshlaganimizda iqtisodchilarda ham, tadbirkorlarning o‘zida ham qandaydir qo‘rquv bor edi. Lekin ishonch bilan, shijoat bilan imkoniyat yaratishdan to‘xtamadik. Mutasaddilarni, tadbirkorlarni eshitishga majbur qildik.  Bu o‘z natijasini berdi, davlat bilan tadbirkorlar o‘rtasida ishonch oshib bordi. Butun jamiyat tadbirkorga do‘st bo‘ldi”, dedi Shavkat Mirziyoyev.

O‘zbekiston tadbirkorlari yangi g‘oya va tashabbuslari bilan barcha tarmoqlarni olg‘a tortayotgani, ular bilan birgalikda katta-katta dasturlar amalga oshirilayotgani ta’kidlandi.

“Biz tadbirkorlikka sharoit yaratdik, ular davlatga yelkadosh bo‘ldi. O‘tgan 4-5 yilda 7,5 million aholining bandligi ta’minlandi. Bu yilning o‘zida 3 milliondan ziyod ish o‘rni ochildi. Investitsiya va biznes muhitini yaxshilamaganimizda bunday natijalar bo‘larmidi”, deya ta’kidladi Prezident.

Qayd etilishicha, tadbirkorlarsiz bunga erishib bo‘lmasdi. Bugun iqtisodiyotning turli tarmoqlarida, ayniqsa, qishloqlarda aholini daromadli qilishda ular harakatlantiruvchi kuch bo‘layotir. Yuz minglab yoshlar, xotin-qizlarni kasb-hunarli qilish, tadbirkorlikka o‘rgatish tajribasi ham tadbirkorlar bilan hamkorlik mahsuli.

“Yurtimizda tadbirkor va ishbilarmonlarning yangi avlodi shakllangani – bu bizning katta boyligimiz va yutug‘imiz. Chunki har bir tadbirkor inson o‘z ortidan o‘nlab odamni ergashtiradi, ularga ish o‘rgatadi, ishli, daromadli qiladi, jamiyat hayotiga yangilik olib kiradi. Sizlarni Yangi O‘zbekiston qahramonlari  desak arziydi”, dedi Mirziyoyev.

Prezident tashabbusi bilan shakllangan an’anaga muvofiq, har yili ilg‘or tadbirkorlar yuksak mukofotlar bilan taqdirlanib kelmoqda. Bu yil nomzodlarni tanlashda o‘z sohasida barchaga o‘rnak bo‘lib, aniq natijaga erishgan, ishlab chiqarish va eksport orqali hududlar, butun mamlakat taraqqiyotiga munosib hissa qo‘shayotgan tadbirkorlarga alohida e’tibor qaratildi.

Marosimda davlat rahbari ushbu mukofotlarni tantanali ravishda topshirdi. Mukofotlanganlar sohani doimiy qo‘llab-quvvatlayotgani va mehnatlariga yuksak e’tibori uchun davlat rahbariga minnatdorlik bildirdi. Tadbirda davlat va jamoat tashkilotlari vakillari, olimlar, ziyolilar ishtirok etdi.

Eslatib o‘tamiz, bugun “O‘zbekiston Respublikasi Prezidentining tadbirkorlar bilan V ochiq muloqotida belgilangan vazifalarni amalga oshirish chora-tadbirlari to‘g‘risida”gi Prezident farmoni imzolangandi.