Ўзбекистонда 2025 йилда қанча бола эмлангани айтилди

2025 йилда Ўзбекистонда юқумли касалликларга қарши эмлаш қамрови республика бўйича 95 фоизни ташкил этиб, 5 млн 600 минг бола 13 турдаги вакцина билан эмланган. Бу ҳақда кеча, 24 февраль куни Санитария-эпидемиологик осойишталик ва жамоат саломатлиги қўмитаси томонидан Санитария-эпидемиологик барқарорликни таъминлашда олиб борилаётган ишлар юзасидан ўтказилган матбуот анжуманида маълум қилинди.

Қайд этилишича, 2025 йилда инсон соғлиғига жиддий таҳдид солувчи вирусли гепатит Б ва С турига скрининг текширувлар учун берилган тестлар сони жами 2 млн 434 минг 900 тани ташкил этган. 

Шунингдек, 2022-2025 йиллар давомида сурункали вирусли гепатит C билан касалланган 47 минг 732 нафар бемор давлат бюджетидан ҳамда Миср Араб Республикасидан берилган дори воситалари ёрдамида тўлиқ даволанган. 

Эслатиб ўтамиз, аввалроқ Жаҳон соғлиқни сақлаш ташкилоти сўнгги бир неча йил ичида касалланиш ҳолатларининг кўпайгани сабабли Ўзбекистонни қизамиқдан холи мамлакат мақомидан маҳрум қилганди.