Эронликлар АҚШга келиши мумкин, аммо биз ҳеч қаерга бормаймиз – Трамп

АҚШ Президенти Дональд Трамп, АҚШ бундан буён Покистонда Эрон билан музокаралар учун делегация юбормаслигини маълум қилди. Бу ҳақда у “Fox News” нашрига берган интервьюсида сўз очди.

“Агар Эрон музокара қилишни истаса, улар АҚШга ўзлари келиши ёки телефон орқали боғланиши мумкин”, деган Оқ уй раҳбари.

Трампнинг таъкидлашича, АҚШ энди вакилларини 18 соатлик узоқ сафарга юбориб, самарасиз учрашувлар ўтказмайди.

Шу йилнинг 8 апрелидан бошлаб буён АҚШ ва Эрон ўртасида ўт очишни тўхтатиш келишуви амал қилмоқда. Трамп бу келишувни номаълум муддатга узайтирганини, яъни Эрон раҳбарияти ягона ва аниқ таклиф ишлаб чиқмагунича амал қилишини билдирган. Шу билан бирга, АҚШ Ҳормуз бўғозида жорий этилган денгиз блокадасини давом эттиришини ҳам айтган.

11–12 апрель кунлари Покистонда АҚШ ва Эрон делегациялари ўртасида музокаралар ўтказилган, бироқ улар ҳеч қандай келишувсиз якунланган. 25 апрель куни Трамп ўз махсус вакили Стив Уиткофф ва куёви Жаред Кушнернинг Исломободга навбатдаги музокаралар учун сафарини бекор қилганини эълон қилган.

“Эрон вакиллари агар хоҳласа, ўзлари боғланиши мумкин, америкалик элчилар эса энди 18 соат учиб бориб, бекорга гаплашиб ўтирмайди”, деган Трамп.

Шу билан бирга, Трамп Эрон раҳбарияти ичида жиддий келишмовчиликлар борлигини ҳам таъкидлаган. Унинг сўзларига кўра, “уларнинг ўзлари ҳам ким бошқараётганини билмайди”.

Эслатиб ўтамиз, аввалроқ Эрон АҚШга Ҳормуз бўғозини кемалар ҳаракати учун очиш ва урушни якунлаш бўйича янги таклиф юборганди. Ушбу таклиф Покистон воситачилари орқали етказилган. Унда узоқ муддатли ўт очишни тўхтатиш режимини узайтириш ёки урушни тўлиқ тугатиш бўйича келишув тузиш назарда тутилган. Шу билан бирга, Эрон ядро дастури бўйича музокараларни кейинроқ муддатга қолдиришни таклиф қилган.