Францияда Луврдаги талончиликдан бир неча соат ўтиб, яна бир музей ўғирланди

Париждаги Лувр музейидаги ўғирликдан бир неча соат ўтиб, Лангр шаҳрида жойлашган “Дени Дидро маърифат уйи” музейидан ноёб экспонатлар ўғирлаб кетилди. Бу ҳақда шаҳар маъмурияти баёнотига таяниб, “France Info” радиостанцияси хабар берди.

Маълумотларга кўра, ҳодиса 20 октябрга ўтар кечаси содир бўлган. Музей ходимлари 20 октябрь куни эрталаб экспонатларнинг йўқолганини ва бузиб кириш изларини аниқлашган. Ҳодиса жойига полиция етиб келган. Талончилар XVIII–XIX асрларга тегишли бир неча олтин ва кумуш тангаларни ўғирлаб кетишган. Қолган экспонатларга тегилмаган. Музей вақтинча ёпилди.

Полициянинг тахмин қилишича, талончилар ҳодисани аввалдан режалаштирган бўлиб, Луврдаги талончилик янглигидан келиб чиққан шов-шувдан фойдаланишган. Лангр шаҳар ҳокимияти музей хавфсизлик тизими тўлиқ янгилангунига қадар бинога кузатувчи хусусий қўриқчиларни жалб қилди.

Эслатиб ўтамиз, Луврдаги ўғрилик 19 октябрь куни эрталаб содир бўлган эди. Икки номаълум шахс музейга кириб, Наполеон ва Жозефина коллекциясига тегишли тўққизта зеб-зийнат жавоҳиротни ўғирлаб кетган. Яна икки нафар шериги уларни ташқарида кутиб турган. Париж прокуратураси маълумотича, жиноят буюртма асосида амалга оширилган бўлиши мумкин.