Олимлар кўриш қобилиятини тикловчи имплант ишлаб чиқди

Олимлар кўриш қобилиятини тиклаш учун фотоэлектрик имплантни ишлаб чиқди. Бу ҳақда “The New England Journal of Medicine” хабар берди.

Маълумотларга кўра, қурилма фотоэлектрик имплант ва ретинал имплант микрочип тизимини ўз ичига олади. У камера сифатида тасвирларни олади ва уларни 2х2 мм ўлчамдаги симсиз ретинал имплантга проекция қилади. Кейин имплант ёруғликни мияга юбориладиган электр импульсларига айлантиради.

Тадқиқотчилар Европанинг бешта мамлакатида яшовчи ёшга боғлиқ макулодистрофиянинг қуруқ шакли (AMD) билан касалланган 38 нафар кекса беморлар иштирокидаги клиник тажрибани ўтказган. Уларнинг кўз тўрпардасининг марказий қисмига кўп сонли электродлар билан жиҳозланган  2х2 мм ўлчамдаги чип имплантация қилинган.

Тадқиқот давомида 32 иштирокчи қурилмадан фойдаланган ҳолда, 12 ойлик кузатувдан ўтган. Қолган 6 нафаридан айримлари вафот этган ёки иштирокдан бош тортган.  Маълум бўлишича, беморларнинг 80 фоизи бир йилдан кейин клиник жиҳатдан сезиларли яхшиланишни сезган. Жиддий салбий таъсирлар ҳам қайд этилган, аммо улар тезда бартараф этилган.

Эслатиб ўтамиз, аввалроқ Япониянинг Миэ университети тадқиқотчилари гуруҳи “Даун синдроми”ни келтириб чиқарадиган қўшимча 21-хромосомани олиб ташлаш имконини берувчи процедураани ишлаб чиққан эди.

Бунёд Келдибоев