Жей Лонинг концерти Тошкентга қанча фойда олиб келгани айтилди

Америкалик суперюлдуз Женнифер Лопезнинг 2025 йил 7 август куни Тошкент шаҳридаги “Бунёдкор” стадионида бўлиб ўтган концертидан Тошкент шаҳрига 42,5 млрд сўмдан ($3,3 млн) ортиқ солиқ тушуми тушган. Бу ҳақда тадбирни ташкиллаштирган Маданият ва санъатни ривожлантириш жамғармаси маълум қилди.

Билдирилишича, бу Ўзбекистон тарихида биринчи марта AAA тоифали артист иштирокида ўтказилган концерт бўлган. Концерт куни стадионга хизмат кўрсатувчи ходимлар билан бирга 31 144 киши ташриф буюрган. 25 мингта билет сотилган ва уларнинг 67 фоизини хорижликлар сотиб олган.

Қайд этилишича, умумий ҳисобда Ўзбекистонга концерт учун 15 330 хорижий сайёҳ келган. Улар орасида 8 945 нафар россиялик, 2 495 нафар қозоғистонлик, қолгани эса Европа ва АҚШдан бўлган туристлар бор.

Маълум қилинишича, 5-8 август кунлари пойтахт меҳмонхоналари ўтган йилнинг шу даврига нисбатан 25,7 фоизга кўпроқ банд бўлган. 7 август куни Чилонзор метро йўналишида 16,5 минг йўловчига кўпроқ хизмат кўрсатилган. Тадбирни ташкил этишда 115 та ташкилот қатнашган. Жами 18 та фуд-корт ва савдо нуқталари фаолият кўрсатган.

Жамоат тартибини ва хавфсизликни таъминлаш учун 88 та йўл-патрул ва махсус техника, 8 та тез ёрдам автомашинаси жалб қилинган. 3,8 минг ҳуқуқни муҳофаза қилувчи орган ходимлари ва 300 нафар волонтёр, шунингдек, 500 нафар хизматчи тадбир ҳудудида тозаликни таъминлаган.