Жейк Пол Саул Альварезга жанг учун 200 млн доллар таклиф қилди

Америкалик блогер ва боксчи Жейк Пол 4 та вазн тоифасидаги собиқ жаҳон чемпиони мексикалик боксчи Саул “Канело” Альварезга қарши жанг ўтказиш учун 200 миллион доллар таклиф қилишга тайёрлигини маълум қилди. Бу ҳақда америкалик блогер Киcк платформасидаги жонли эфир вақтида билдириб ўтди. 

“Канело, сенга 200 миллион доллар бераман – осон пул. Жейк Пол ва Канело жанги айнан мухлислар кутаётган тўқнашув. Бу боксдаги энг катта жанг бўлиши мумкин”, дейди Пол.

Кейинроқ у Альварез билан телефон орқали гаплашганини ва мексикалик боксчи ҳам жангга розилик билдирганини айтган.

“Канело телефонда гаплашди, демак биз бу жангни ташкил қиламиз. Менда 200 миллион доллар бор ва менимча, бу кейинги жанг бўлади. Шартномани имзолайлик ва боксдаги энг катта жангни ўтказайлик”, дея қўшимча қилди америкалик блогер.

Маълумот учун, 2025 йил декабрь ойида Пол британиялик Энтони Жошуага қарши жангда олтинчи раундда нокаутга учраган эди. Ушбу жангдан кейин унинг икки жағ суяги сингани хабар қилинганди. 29 ёшли Пол профессионал фаолияти давомида 14 та жанг ўтказиб, 12 тасида ғалаба қозонган ва икки бор мағлубиятга учраган. У мағлуб этган боксчилар орасида Майк Тайсон ҳам бор.

2025-йил сентябрь ойида эса Альварез супер ўрта вазн тоифасидаги мутлақ жаҳон чемпиони унвони учун жангда Теренс Кроуфордга имкониятни бой берган.

35 ёшли Альварез ҳисобида ҳозиргача 63 та ғалаба, 3 та мағлубият ва 2 та дуранг мавжуд. У 2026 йил сентябрь ойида WBC камари учун франциялик Кристиан Мбиллига қарши рингга чиқиши кутилмоқда.