Britaniya Ikkinchi jahon urushidagi g‘alabaning 80 yilligini nishonlashni boshladi

Buyuk Britaniyada Yevropada Ikkinchi jahon urushi tugaganining 80 yilligini nishonlash uchun bir qator bayramlar boshlandi. Bu haqda BBC xabar berdi.

Yevropa mamlakatlari bu kunni 8 may kuni nishonlaydi, ammo bu yil yubiley bo‘lgani sharafiga joriy yilgi bayram bir necha kun davom etadi. Bayram kecha, 5 may kuni tushda Big-Benning qo‘ng‘irog‘i bilan boshlandi. Britaniyalik aktyor Timoti Spoll Uinston Cherchillning 1945 yil 8 mayda radio orqali aytgan mashhur g‘alaba nutqini o‘qib eshittirdi.

1300 dan ortiq odam ishtirok etgan harbiy kortej London markazi orqali Parlament maydonidan Bukingem saroyiga o‘tdi. Unga 100 yoshli Ikkinchi jahon urushi faxriysi Alan Kennet boshchilik qilgan.

Kortejni qirol Charlz III, uning rafiqasi Kamilla va Uels shahzodasi Uilyam butun oilasi – rafiqasi Keyt, shahzodalar Jorj va Lui hamda malika Sharlottalar bilan tomosha qildi.

Harbiy kortejda Ukraina harbiy xizmatchilari ham ishtirok etdi. Ularning aytishicha, bu katta sharaf va g‘alabaning bir yilligining o‘zi tinchlik naqadar qadrli ekanini, uni himoya qilish naqadar muhimligini eslatib turishi kerak.

Parad Qirollik Harbiy-havo kuchlari eskadrilyasining maxsus parvozi bilan yakunlandi. London osmonida, shuningdek,  F-35M  Lightning va Typhoon qiruvchilari hamda Ikkinchi jahon urushida qo‘llanilgan eng mashhur og‘ir bombardimonchilardan biri bo‘lgan Lansaster bombardimonchisi parvoz qildi.

Eslatib o‘tamiz, avvalroq Rossiya Prezidenti Vladimir Putin joriy yilning 9 may kuni o‘tkaziladigan Ikkinchi jahon urushidagi g‘alabaning 80 yilligi munosabati bilan sulh e’lon qilgandi. Ukraina Prezidenti Vladimir Zelenskiy esa Putin tomonidan 7 maydan 11 maygacha mo‘ljallangan uch kunlik otashkesim taklifini rad etdi.