Алишер Қодиров пиво фестивали ўтказганларни жазолаш кераклигини айтди

Олий Мажлис Қонунчилик палатаси депутати, “Миллий тикланиш” демократик партияси фракциясининг раҳбари Алишер Қодиров Тошкентда пиво фестивалини ўтказган ва унга рухсат берган шахслар жазоланиши кераклигини айтди. Бу ҳақда Қодиров Telegram-каналида ёзди. 

Депутатга кўра, “Реклама тўғрисида”ги қонунга мувофиқ, ҳар қандай алкоголли ичимликлар рекламаси, алкоголли ичимликлар номи, белгиси ёхуд тасвиридан фойдаланиладиган тадбирларда ҳомийлик қилиш тақиқланади.

“Бу фестивални ўтказган ва ўтказишга рухсат берганлар жавобгарликка тортилиши керак”, деган депутат. 

Маълумот учун, “Реклама тўғрисида”ги қонуннинг 39-моддасига мувофиқ, пивони, табиий ва кўпикланадиган виноларни реклама қилишда рағбатлантирувчи акциялар ёки шунга ўхшаш бошқа тадбирлар ўтказишга, маданий-кўнгилочар, оммавий ва спорт тадбирларига ҳомийлик қилишга йўл қўйилмайди.

Қайд этиш жоиз, жорий йилнинг 27-29 июнь кунлари Тошкент шаҳрининг Тарас Шевченко кўчасида пиво фестивали ўтказилди. Аммо ушбу фестиваль ҳақида ҳеч ким изоҳ бермади ва ким томонидан ўтказилгани-ю, ким бунга рухсат бергани ҳам очиқланмади. 

“Миллий тикланиш” демократик партияси раиси ўринбосари Феруза Муҳаммеджонова эса ушбу фестивални кескин танқид қилиб чиқди. Муҳаммеджоновага кўра, пиво фестивалига ўзбек ОАВлари умуман муносабат билдирмаган, лекин рус ОАВларида ушбу тадбир фаол равишда ёритилган. 

“Ўзбек жамиятида ҳам спиртли ичимликлар фестиваллари очиқчасига, оммавий шовқин ва реклама билан ўтказиляпти”, деган Муҳаммеджонова. 

У, шунингдек, дарахт кесиш мавзуси ҳақида ҳамма гапиргани, аммо ушбу фестиваль ҳақида ҳеч ким миқ этмаганини қўшимча қилган. 

“Дарахт кесишга исён, пиво фестивалига сукунат!!!” деган “Миллий тикланиш” партияси аъзоси.