Украина асирдаги 1000 аскарни алмашишдан бош тортди – Россия

north_east

Зеленский Россия томонида ўзбекистонликлар ҳам жанг қилаётганини айтди

Россия Президенти маслаҳатчиси ва Истанбулдаги тўғридан тўғри музокараларда Россия делегацияси раҳбари Владимир Мединский Украина асирга олинган минг аскарни алмашишдан бош тортганини айтди. Бу ҳақда у кеча, 6 август куни ўзининг Telegram-каналида эълон қилган баёнотида маълум қилди. 

У Украинани алмашинув жараёнини секинлаштиргани учун танқид қилди.

“Киев 1000 нафар украиналик аскарни алмашишдан бош тортмоқда. Шу сабабдан иккинчи даврада алмашув жараёни мураккаб кечди, учинчи турда ҳам алмашинув бошланмади”, деди Мединский.

Россия ва Украина ўртасидаги музокараларнинг учинчи босқичи 23 июль куни Туркия мезбонлигида Истанбулда бўлиб ўтди. Музокаралар давомида Россия Украинага онлайн режимда ишлайдиган учта ишчи гуруҳ тузишни таклиф қилди. Асирга олинган камида 1200 аскарни ўзаро алмашиш ва дафн маросими бўйича билдиришномаларни алмашиш бўйича келишувга эришилди.

Маълумот учун, Истанбулдаги музокараларнинг учинчи раундидан сўнг Украина делегацияси раҳбари Рустам Умаров Владимир Зеленский ва Владимир Путин ўртасидаги учрашувни август ойи охиригача ўтказишни таклиф қилганини айтди. Кремль матбуот котиби Дмитрий Песков 24 июль куни бу сценарийни даргумон деб атади. Унинг сўзларига кўра, саммит тинчлик музокаралари якунида, “бу музокаралар натижалари қайд этилиши учун барча ишлар амалга оширилган”дагина мумкин бўлади.

Бироқ 25 июль куни Зеленскийнинг ўзи россияликлар “энди суҳбатларда бу ҳақда гапира бошлагани, бу аллақачон қандайдир учрашув форматига ўтиш эканини” айтди. Бунга жавобан Песков яна август ойида саммит бўлмаслигини айтди, чунки “юқори даражадаги учрашув келишувга якуний нуқта қўйиши мумкин ва керак”.

Эслатиб ўтамиз, кеча, 6 август куни АҚШ Президентининг махсус вакили Стив Уиткофф Кремлда Россия Президенти Владимир Путин билан учрашганидан сўнг, Президент Дональд  Трамп келаси ҳафта Путин билан учрашишни, кейин эса Зеленский билан уч томонлама учрашув ўтказишни режалаштираётгани хабар қилинди.